الجزء الثاني من الفصل الرابع والأربعون رواية الخادمة الصغيرة الجزء الثاني

علي حس انه رفضه ليها هو السبب ! وحس من جواه بندم على الكلام إللي سمعه ليها .. وهنا كملت حياة بمعلومة أول مرة يعرفها وهي بتقول بندم وحسرة 

_بعت صورة واحدة بس .. واحدة بس وفجأة لقيته بيهددني بصور كتير .. معرفش هو هكر تليفوني ولا لأ ومعرفش جابهم منين ! معرفش .. بس أنا الغلطانة إللي بعتله صورتي من غير الطرحة وحاطة مكياج  

الدم فار في عروقه من المعلومة الخطيرة دي !!! وعقله انتبه لألف حاجة ..وبعدها هي كملت تأكد شكوكه أكتر 

_ ونسيمة قالتلي .. قالتلي ان عادي الست تحس انها عايزة تكون وتبان حلوة ومغرية .. بس أنا .. مكونتش عارفة ان كل دا هيحصل .. ومكونتش أعرف إني كدة بنت وحشة ورخيصة .. أنا كدة بنت وحشة ورخيصة أوي ! .. 

سكت وعينه احمرت من الغضب وكله نية انه هينول نسيمة عقاب عسير لو تأكد من شكوكه .. سأل برفق رغم صعوبة السؤال

_ هي نسيمة إللي كانت بتخليكي تجيلي ؟

هزت راسها في خجل من نفسها وبعدها قالت 

_ كانت بتفضل تقولي كدة هتحبني .. وكدة هكسبك ... بس أنت كنت بتكرهني أكتر وبتبعد عني وبتشوفني وحشة أكتر... 

طبطب على ضهرها وقال 

_ أنا عمري ما أشوفك وحشة .. اهدي يا حياة ..الحمدلله إنك كويسة وبخير .. 

حاولت تهدى فعلا وقالت وهي بتبتصله 

_ بس أنت مش بخير ..هتعمل إيه مع بابا ؟

ربت على كتفها بعد ما خرجها من حضنه وقال 

_ متشغليش بالك كل دا هيتحل .. المهم خليكي إنتي في حالك ومالكيش دعوة بنسيمة تاني .. ماشي ؟ 

هزت راسها بموافقة فبصلها في عيونها وقال

_ حياة ! أنا مربيكي ومش غريب عليكي .. اوعديني انك مالكيش دعوة بنسيمة دي تاني وانها متعرفش أي حاجة عنك بعد كدة ولو معاها أي حساب من حساباتك .. احذفيها من عليه ! 

بصتله بعيون محتارة وقالت 

_ هي مش معاها أي حساب .. 

وبعدها قالت وكأنها افتكرت حاجة 

_ هي بس معاها الإيميل إللي باخد عليه دروس على اليوتيوب .. 

سأل علي 

_ معاكي ايميل غير دا ؟ 

هزت راسها بلأ .. ضغط على سنانه بعنف وحاول يهدي نفسه أدام حياة وبعدها قال 

_ تمام ..سيبي الإيميل دا شغل بينكم ومتشيلهاش من عليه .. وأي حاجة تحصل تقوليها ليا أو للدكتورة.. متثقيش في حد تاني !

بصتله وافتكرت الدكتورة وقالت وهي بتعيط

_ أنا كنت ظلماها أوي هي كمان وهي أكتر واحدة وقفت معايا .. 

_ قولتلك قبل كدة انها جدعة وطيبة أوي بس انتي مسمعتيش الكلام .. 

قالت بحسرة وحزن 

_ ياريتني سمعت كلامك في كل حاجة ... كان زماني دلوقتي كويسة ومحصليش إللي حصل ..

بصلها علي كتير.. وبعدها تنهد وهو بيقول 

_ معلش .. درس يا حياة .. درس حتى لو انتي متستاهليهوش .. وابتلاء من ربنا لازم تتحمليه وتصبري .. وربنا هيعوضك وحقك جالك ولسة هيجيلك .. 

وبعدها قام عشان يمشي تاني من مكان ما جه فوقفت تقول بلهفة وحزن ولسة الدموع في عيونها وعلى خدها 

_ خلي بالك من نفسك... لو حصلك أي حاجة مش هسامح نفسي 

بص جوا عيونها .. وبعدها قال

_ مش هيحصلي حاجة .. خلي بالك من نفسك.. وآه قبل ما أنسى.. 

راح تاني ورجع وخرج من جيبه موبايل زراير كدة واداه ليها وقالها 

_ دا موبايل جديد مفيهوش نت بس فيه رصيد ورقمي ورقم أبوكي ورقم الدكتورة .. تخبيه معاكي فين ما تروحي ومتشيلهوش من جيبك .. وتنسي الموبايل التاني دا عشان خلاص امتحاناتك قربت ومفيش وقت لتضييع الوقت .. 

عيطت حياة وهي بتاخد الموبايل منه فصعبت عليه وقلبه رق وهو بيقولها بمنتهى الحنان 

_ عارف ان حزنك وصدمتك ... فوق طاقة أي حد إنه يتحملهم ..ولو عاوزة تأجلي دراسة أجلي يا حياة أهم حاجة صحتك 

لكنها هزت راسها وقالت 

_ مش عارفا هقدر ولا لأ... بس أنا مش عاوزة أخسر تعليمي كمان .. 

بصلها وهو مش عارف يقولها إيه ولا يعمل إيه ..ولكنه جه في باله كلام ولسة هيقوله سمع صوت جاي من برا فودعها بسرعة وخرج من البلكونة وهي كانت قلقانة عليه .. وراحت تشوف مين جاي ... بس بصت لقتها نعمات عادي فتنهدت وجات تبص من البلكونة على علي لقته نزل بسلام ومشي ... فضلت تبص لضهره وتفتكر انه كان أمانها وسندها في وقت لو مكانش موجود فيه .. كانت هي ضاعت .. ضاعت للأبد !