الجزء الثاني من الفصل الثامن والسبعون رواية الخادمة الصغيرة الجزء الثاني 

______

 

كانوا عند الدكتور بعد اللي حصل يومها بالظبط .. وكان معاد يحي انه يفك الجبس خلاص ... 

كانوا كلهم حواليه ومبسوطين جدا وفرحانين ان هو خلاص هيفك الجبس .. وخف تماما وكل جروحه اختفت... 

كانوا حواليه في العيادة ورضا معاهم ...واول ما فكه قربت منه وطبطبت عليه وهي بتقوله 

_ مترجعش تشتكي من المذاكرة بقى .. 

هنا حياة ضحكت معاها وقالت 

_ خلاص بقى كلها شهر على الامتحانات ونبقى دكاترة زي بعض 

رضا ضحكت وقالت بحب

_ ان شاء الله يا حبيبتي تبقي زي مانتي عايزة .. 

وجلال كان واقف مبسوط بيهم جدا .. لحد ما جاله نليفون ان كل حاجة جاهزة وانه يقدر ينقل امه عند نسيمة .. قرر انه ينقلها في المخزن اللي جنب نسيمة لكن مهما كان ...جهز ليها اوضة فيها سرير واضاءة كويسة ... مقدرش يرميها زي ما رمى نسيمة رغم ان امه هي راس الحية ... 

وهنا خلص الفحص وجلال حضن يحي بقوة وكان مبسوط بيه أوي ... ورضا حاسة انها ملكة .. حاسة ان حمل كبير من على قلبها انزاح .. وفرحت أكتر لما وصلوا البيت ونزلوا لولاد سبقوهم للأوض .. وشها جلال من ايدها باسها تاني وقالها في ودنها 

_ هتمشي النهاردة .. مش هتبقى موجودة خلاصةفي حياتنا .. 

بصتله رضا بثقة ودلال وتقلت عليه ومشت ومدتلوش عُقاد نافع ومحسستوش انه بيعمل حاجة جامدة يعني .. 

وفعلا جلال جاب انجي على كرسي متحرك وخلى رجالته هما يشيلوا الكرسي بيها ويدخلوها عربية خصصها لنقلها وراح ياخدها للمخزن ...

ولكن قبل كدة دا .. قابلت رضا انجي وهي خارجة من البيت وحواليها رجالة جلال .. إللي بيزق الكرسي بتاعها .. والتانيين عشان يمنعوا اي حركة لليها من الفرار والمقاومة .. 

_ قولتلك امبارح هطردك .. النهاردة اتطردتي ... 

قالت لها رضا وهي عيونهم في عيون بعض .. وبعدها قربت أكتر وهي بتقول بانتشاء وسعادة الانتقام .. 

_ البيت دا بيتي .. الأملاك اللي عيشتي عمرك كله تسعي ليها .. بقت بتاعتي وابنك الوحيد خاتم في صباعي .. كل حاجة تحت رجلي يا انجي بما فيهم راسك ...

انجي اتخنقت وكل كلمة من رضا كانت بمثابة سم بتتجرعه وحقدها قربت تموت بيه من شدة وقع كلمات رضا عليها وانها فعلا شايفة نفسها انهزمت وانبطحت وتم الانتقام منها ..  

_ بقى فيه واحدة ليها قيمة تنام مع واحد خانها مع طوب الأرض ! انتي رخيصة وهتفضلي رخيصة .. 

ولكن كعادتها .. مينفعش تسكت حتى وهي خسرانة .. زي الحية اللي بتطلع في الروح ولسة بتبخ سم

وهنا حصلت الصدمة الحقيقية للكل !!! كلام انجي القذر اللي بتقوله ادام الرجالة ... والأشد .. الثفعة القوية إللي نزلت بعنف شديد على وش انجي لدرجة ان خاتم رضا عورها في خدها وعملها كدمة جامدة .. وشدت رضا كرسي انجي وحطت عيونها في نص عين انجي بكل قوة وجبروت 

_ كان بيخوني عشان انتي كنتي شيطان .. كنتي مسخرة حياتك عشان تخليه يبعد .. ورغم كل دا .. ورغم كل حاجة .. حبني بردو .. مِرض عشاني .. عاش في جحيم عشاني .. انما انتي ايه ؟ بتتطردي على ايد رجالته برا البيت زي الكلبة !! واحدة تانية واخدة مكانك وبيتك الكبير وواخدة الراجل اللي متستحقيش ضفره .. ونا واخدة ابنك وواخدة البيت التاني .. انتي الوحيدة الخسرانة يا انجي .. انتي الوحيدة ... 

وبعدها اتعدلت وانجي عيونها احمرت وبدون ما تدري .. عيطت ! .. انجي عيطت .. 

الدمعة دي خلت رضا تتفاجئ بل تتصدم .. انجي بتعيط ! ..انجي نفسها محستش بالدمعة وهي بتنزل من عينها .. دمعة غادرة قوية جدا نزلت من عينها بدون ما تقدر توقفها .. محستش حتى انها هتنزل ... دمعة سجلت ان دي أقصى مرحلة قهر وصلت ليها انجي .. وانها انتهت ... 

وهنا سابتها رضا وهي بتقول 

_ استمتعي بالزريبة ... 

وطلعت على اوضتها تتمخطر براحتها وفي سعادة .... راسها مرفوع ...وكل واحد اذاها .. خدت حقها منه .. سلبت من كل واحد فيهم أهم حاجة في حياته زي ماهما زمان خدوا منها اهم حاجة في حياتها .. لكن الفرق ان وقعهم اضل وأقسى . . هي على الأقل لما وقعت .. رجعت سندت نفسها وبقت احسن الف مرة .. لكن هما وقعتهمم مفيش بعدها قومة .. كدة حياتهم انتهت وهما لسة عايشين .. اندفنوا بالحيا .