الجزء الثالث من الفصل الثامن والستون من رواية الخادمة الصغيرة الجزء الثاني 

دخل يحي وحياة سوا يتطمنوا على جلال .. وكل دا ومحدش جاب سيرة لحسين إللي مرضوش يزودوا همومه ويقولوله اللي انجي قالته لجلال .. ولكن مع غياب جلال عن الشغل .. طبعا حسين جه 

وحسين دايما في الشغل مع جلال وعمره ما سابه لواحده .. كان إيد في إيد معاه علطول  .. رغم انه بقى ليه أسرة وابن تاني ..  ولكن عمره ما ساب جلال ... وعلطول في الصورة . ..

حمزة جه وحسين وكريمة  ....ورضا بررت تعب جلال ان هو مربوط بالسكر وانه أهمل دواه وأكله ونومه فتأثر .. وطبعا كلهم اتطمنوا عليه وفضلوا طول اليوم عنده لحد باليل ومشوا... 

وهنا بعد ما مشوا علطول .. رامز جاب نعمات وجه يشوف جلال .. 

كان جلال كويس وصحته حلوة جدا .. رضا مغدياه كويس أوي غصب عنه خلته ياكل وواخد دواه وصحته زي الفل .. هو بس مش قادر .. تخيل تحس إنك حد بيحطلك مخدرات عشان تزني ! .. كأن حد اغتصبك أو تحرش بيك وأنت راضي غصب عنك ! يعني أقسى من انك تكون متاخد غصب ! على الأقل وقتها هتكون عارف انك رافض .. لكن انك يتم التحكم بيك بدون حتى علمك .. دي المصيبة ...كانوا المساجين فيي السجون بيتكلموا عن أنواع التعذيب ان منها بيحطوا ليهم منشطات جنسية من وراهم .. ولما يطلبوا يفرغوا الطاقة دي مع الظباط .. يرجعوا يعايروهم  ويذلوهم وكان دا للأسف بيدمر نفسية المساجين  ! ... ودا إللي حاصل مع جلال دلوقتي.. لما اكتشف ان بعد العمر دا كله .. كان بيتم تعذيبه واستعماله بالشكل المهين دا ! ... 

_ لا بس وشك منور .. 

_ من أكل الدكتورة .. 

قال رامز وهو قاعد مع جلال فرد يحي وهو بيبتسم لرضا  وأبوه بخب  إللي ردت ليه الإبتسامة ببرود بس فيه ود في هزارهم سوا  ... فابتسم رامز ونعمات على الجو المشاغب إللي عيلة جلال بقت عايشة فيه .. 

كانوا كلهم قاعدين سوا في البراند .... البراندا إللي رضا خلت المساعدين ينضفوها .. بتكون عبارة عن غرفة ولكن أحد حيطانها مفتوحة .. وبتكون زي بلوكونة واسعة ولكن في الدور الأرضى وبتطل على الجنينة وفيها قعدة مريحة وحلوة وهواها جميل .. 

كانوا قاعدين باليل سوا وجلال فك شوية لما جه رامز ويحي وحياة قاعدين معاهم.. 

ابتسم جلال بتعب لجملة رامز .. وبعدها بث ليحي وقاله 

_ هتفك الجبس امتى ؟ 

_ اليومين دول كدة بس مش عارف يوم إيه بالظبط 

قال يحي وهو بياكل مكسرات ومتسلي جدا بالقاعدة دي .. مبسوط انه قاعد مع عيلته وأبوه وحاسس بدفئ .. زي حياة بالظبط إللي كانت قاعدة وزراع باباها محوطاها وكانت بردو بتاكل مكسرات ومارشميللوا من إللي رامز جابه ليها مخصوص .. 

ورضا ونعمات قاعدين بردو في نفس القاعدة وبيشربوا قهوة وبيتكلموا على جنب في حجات كدة بصوتهم الهامس .. 

رامز مقالش حاجة خاصة لجلال خالص .. هو بس كل إللي طلبه منه .. 

_ جلال .. تعالى نتمشى سوا شوية .. 

بصله جلال إللي اتنهد وهز راسه ببطئ وقام .. تحت نظرات رضا إللي أول ما قام وقفت وقالتله 

_ الشال .. خده معاك . 

كانت رقيقة وصوتها خافت ليه .. ولكن الكل لاحظ اهتمامها بيه .. ابتسم ليها جلال وفعلا أخد الشال وطلع هو ورامز يتمشوا في الجنينة أدامهم