الجزء الأول من الفصل الثامن والستون من رواية الخادمة الصغيرة الجزء الثاني 

_____

تاني يوم الصبح جلال صحي متأخر  ... أو بالمعنى الأصح .. هو صاحي من بدري ولكنه مش عاوز يتفح عينه ويواجه الدنيا السيئة إللي عاش فيها  .. 

رضا قامت وشافت البيت محتاج إيه وطبعا مش لوحدها لأن  معاها مساعدين بييجوا هما يهتموا بالبيت خصوصا في غياب نعمات 

وبما ان رضا مش بتثق في حد .. فطبخت هي وعملت الأكل والمساعدين رتبوا البيت وغسلوا كل ما يحتاج انه يتغسل سواء هدوم أو  حجات في البيت أو أطباق  .. أما الأكل فهي إللي عملته .. وفعلا ليها حق .. دا أمه كانت بتحطله سم في  الأكل  ... الناس مش هتعمل كدة ؟ ...وهي كمان مبقتش بتثق في حد خالص .. والغريبة إنها بتحرص على جلال وولاده .. 

رضا خلصت الطبخ ... والمساعدات إللي بيساعدوها من أهل البلد إللي شغلهم الأساسي هو الشغل في البيوت والخدمة في البيوت ... خلصوا هما كمان .. ورضا بصت لواحدة فيهم وقالت 

_ ممكن تطلعي تشوفي مدام انجي .. 

رغم كل إللي حصل وكرهها ليها .. إلا إن انجي محتاجة رعاية ... وطبعا هي مش بتعمل كدة حبا فيها ولكن هل يعني هتسيبها تموت ؟ أكيد لأ 

وبالفعل المساعدة طلعت تشوف انجسييعايزة إيه وتديلها كمان الدوا اللسان الدكتور كتبه ليها وإللي رضا جابته وادته للمساعدة .. 

المساعدة أكلتها وشربتها وكمان ساعدتها في تغيير هدومها وكل حاجة انجي كانت محتاجاها اتعملت .. ورغما نها بتمشي إلا  ان لسة طبعا مش قادرة تمشي كويس أو تاخد خطوات ثابتة وحتى الكلام لسة متأثر ولكن بتقدر تتكلم .. 

المساعدة بعد ما خلصت راحت قالت لرضا .

_ مدام انجي بتقولك يا دكتورة ابقي اطلعيلها ...

هنا بصتلها رضا وسكتت .. العقربة عيزاها في إيه؟ .. 

ولكنها اتكلمت بهدوء وتداركت الأمر 

_ ماشي .. شكرا تقدري تتفضلي وتعالي بكرة في نفس المعاد .

قالت المساعدة بطيبة 

_ ان شاء الله.... تعوزي مني حاجة يا دكتورة ؟ 

ردت عليها رضا بلطف رغم تخشب ملامحها من طلب انجي 

_  سلامتك يارب .. 

_  مع السلامة 

قالت الست فردت عليها رضا 

_ مع السلامة .. 

وبعدها الست خرجت ورضا فضلت واقفة مكانها بتفكر ... تروح انجي ولا تتجاهلها كأنها كلبة ؟ .. رضا خدت قرارها ...ومش هتروح .. وتولع انجي إللي أكيد عوزاها عشان تسمها بسمومها ...