الجزء الرابع من الفصل الثامن والستون من رواية الخادمة الصغيرة الجزء الثاني 

______

جلال حكى لرامز عن كل إللي اتقاله من أمه.. حكاله عن القرف إللي هو كان عايش فيه ومش داري ومش عارف ! .. 

وهنا رامز بصله بعد ما سكت بشوية وقال وهو بيحاول يهديه .. 

_ مع ان كل دا مؤلم .. بس هو ياجلال بين انك مكونتش وحش ومستهتر للدرجة دي .. مع انك غلطت كتير... بس الغلطة دي بالذات  .. أنت بريئ منها .. 

بصله جلال .. وحس ان دي الحاجة الوحيدة إللي فعلا ممكن تصبره .. ولكنه قال 

_ بس مش من أمي ! مش أمي إللي تعمل فيا كدة .

_ ماهي عملت كل حاجة يا جلال ... مجاتش على دي يعني . 

قال رامز بسخرية مريرة وجلال عارف انه عنده حق فعلا .. وبعد شوية صمت وصفى .. قال رامز باللي مكانش قادر يداريه ولا يخبيه عن جلال 

_ تفتكر مازن كان عارف ؟ 

جلال استغرب 

_  وإيه دخل مازن ؟ 

_ ماهو عملها تاني من كام يوم .. 

قال رامز فبردو جلال مكانش مقتنع ولكن وصله شك .. ورامز هنا وضحله أكتر 

_ بص يا جلال أنا هحكيلك حاجة حصلت معايا أنا وهو زمان .. 

وبدأ رامز يحكيله لما شاف من زمان نوع المنشط الأمريكي إللي كان مع مازن ...ولما خلص قال لجلال إللي كان مصدوم ان كل دا كان بيُحاك من ورا ضهره من سنين طويلة ... 

_ ممكن يكون هو إللي كان بيديه ليهم وهما يحطوه ليك 

_ بيكرهني من زمان كدة ..  

قال جلال بسخرية وفي نفس الوقت حزن .. بصله رامز ومكانش عارف يقوله إيه... 

_ متشغلش بالك أنت وأنا هعرف آخر الموضوع دا 

.

وربت على كتف جلال .. وهما الاتنين رجعوا تاني للبراندا ...

_______

بعد ما نعمات ورامز مشوا ويحي وحياة طلعوا على أوضهم .. جلال فضل سرحان وبيفكر في كلام رامز .. لو طلع حقيقي  .. هيبقى فيه حرفيا عصابة بتخطط لحجات كتير أوي من ورا ضهره ويمكن ما خفي كان أعظم بكتير !! .. 

رضا كانت واقفة عند التسريحة، بتسرح شعرها وواخدة بالها ان جلال سرحان ... ، وكل شوية تبص عليه من المراية، تشوف ملامحه الجامدة اللي مفيهاش أي حياة.

قالت بهدوء وهي بتقرّب وبتشاور بعينها على العصير الموجود فوق الكومود إللي جنب السرير 

– جلال... اشرب العصير ده 

ما ردش.

رفع عينه ليها للحظة، وبعدين رجّع نظره للأرض تاني، وكأن صوته اتكسر جواه.

حاولت تبتسم، ابتسامة صغيرة باهتة 

– خلاص ما تتكلمش ... بس اشربه .. ولادك قلقانين .. خليك مسئؤل شوية . 

بردو مستجابش فخدت الموضوع عند وشالت الكوباية من على الكومود جنب سريره، وقعدت قدامه،  وقربت الكباية من بقه وهو بتقوله بعند 

_ هتشرب يعني هتشرب  .. 

جلال مكانش عاوز وكان عامل زي الطفل إللي أمه بتشربه اللبن ..

_ يابني أشربه الله !! 

_ آه شفايفي طيب .. 

قال بألم وهي شفايفه خبطت في سنانه بسبب الكوباية .. بصت لشفايفه إللي بتلمع 

_ آه ! 

رددت تتريق عليه بسخرية .. فبصلها وهو بيلمس شفايفه بصباعه مكان ما اتخبطت .. فبصتله وهو بيعمل كدة وسرحت فجأة وهي شيفاها بتلمع بالعصير .. 

_ مالها شفايفك .. ماهي حلوة أهي 

_ حلوة ؟

طبعا جلال باشا خد باله فورا من نظراته وفجأة صوته ونظراته هو كمان اتغيرت فبصتله وهزت راسها .. مفيش فايدة من خبثه .. لو الدنيا انطبقت على الأرض هيفضل طبعه زي ماهو .. 

_  بتفوق على إللي يعجبك بس .

قالت فابتسم وبعدها محى ابتسامته وكشر وقال  

_ على فكرة أنا زعلان .. 

_ ياراجل .. عيني في عينيك كدة 

وقربتله وبتبص في عينيه فرد وهو مش قادر يقاوم قربها 

_ كدة هقوم اتنطط من الفرحة 

ضحكت بخفة وادتله الكوب وهي بتقول 

_ عيزاك تشرب .. 

وقامت ودخلت الحمام وهو فضل يبصلها وشرب الكوب كله ....

*** فيه عروض حلوة جدا الروايات كلها سعرها  ١٢٠ جنية أو روايتين سعرهم ١٠٠ ***

✔️أسعار الروايات 

✔️رواية الخادمة الصغيرة الجزء الثاني  كاملة سعرها ٧٠ جنية 

✔️رواية ابنة الراقصة كاملة والنوفيلا بتاعتها سعرها ٧٠ جنية 

✔️نوفيلا عشق أولاد الذوات الجزء الأول كاملة سعرها ٣٠ جنية 

✔️حجز رواية عشق أولاد الذوات الجزء الثاني سعرها ٧٠ جنية 

✅️العرض هو لو اشتريتي روايتين مع بعض هتاخديهم بسعر ١٠٠ جنية بدلا من ١٤٠ جنية 

ولو اشتريتي تلت روايات .. هتاخديهم بسعر ١٢٠ جنية  بدلا من ٢٤٠ جنية وكمان هدية نوفيلا عشق أولاد الذوات الجزء الأول .. 

التحويل فودافون كاش على رقم 01098656097 

الاستلام فوري✅️