الجزء الثاني من الفصل الثاني والخمسون رواية الخادمة الصغيرة الجزء الثاني
جلال كان سايق وكل شوية تجيله رسالة مصورة من نسيمة وهي بتجرح في إيدها ! .. وانه لو مجاش هي هتقتل نفسها !
كانت بتعيط ومنهارة في التليفون لما كلمته .. وتفاجئ بيها بتقوله انها هتنتحر ويا يلحقها يا ملحقهاش ! وهو هنا مقدرش يستحمل وكان لازم يروحلها بسرعة ..
ولكن وهو في الطريق .. بدأ يحس بحجات غريبة بتحصله .. ارتفاع في ضربات القلب وارتفاع في درجة الحرارة وأول ما وصل الطريق لاحظ قطرات عرق على جبينه ..
حاول يشتت نفسه .. فكر ان دا بسبب كلام نسيمة ليه وانها هتقتل نفسها .. خصوصا إنه كان بيحاول يوصل لأبوه ولكريمة ولكن مكانش حد فيهم بيرد !! .. وهنا كان حاسس بخطر أكبر ...
دخل جلال البيت والأعراض بتزيد مش بتقل .. ويادوب وصل ..
وبعد دقايق من دخوله .. كانت عربية تانية بتقف أدام البيت ! وبتنزل منها رضا إللي لما شافت عربيته اتعصبت وتأكدت شكوكها .. وهي إللي كانت بتكدب نفسها طول الطريق !
أول ما جلال دخل سمع صوت جاي من أوضة نومه القديمة هو ونسيمة .. راح هناك واتفاجئ بيها وهي فعلا بتعيط وفيه نقط دم بتنزل من ايديها !!
أول ما شافته صرخت وانهارت أكتر وهو مكانش عارف يعمل إيه ولكنه قرب ليها وشال منها السكينة بسرعة وهي بتصرخ وبتقوله
_ حرام عليك تعمل فيا كدة .. سايبني لواحدي كدة .. عاجبك إللي وصلتله من بعدك .. من بعد ما حرمتني منك .
جلال كان بيحاول يخليها تبطل تتحرك كتير وبيحاول يقعدها عشان يشتف جروح ايديها
قعدها على السرير وهي لسة بتتكلم وهو أعراضه بتزيد وحاسس بنار جواه ... بصت في عينه لقتها بتلمع وشفايفه لونها أحمر وعلى جبينه عرق
_ بتعملي في نفسك كدة ليه ؟ متعرفيش ان دا حرام
قال جلال فردت عليه وهي بتقوله وبتحسس على وشه بايدها المجروحة ومستغلة شفقته عليها في انها تلمسه
_ ومش حرام بعدك عني ؟ مش حرام انك بتبعدني ومش عاوزني في أي مكان أنت فيه ! .. موحشتكش حتى ولا للحظة فكرت فيا !!
بصلها جلال وسكت ومتكلمش .. بلع ريقه فجأة وضغط على أسنانه وهي كانت قاهمة .. كانت فاهمة وعارفة هو بيمر بإيه كويس جدا ...واختارت انها تقرب أكتر وهي بتقوله
_ وحشتني أوي .. وحشتني لمستك يا جلال .. وحشتني ..
صوتها كان كله رغبة .. وأول مرة يلاحظ القميص إللي هي لبساه ! ... وجسمها ظهر أدامه وحس بصعوبة في التنفس وصعوبة في انه يشيل عينه .. حاولت تقربله وتلمسه وهو كان بيقاوم ... رغم كل إللي حاسس بيه إلا إنه كان بيقاومها .. وفجأة اتفتح الباب .. بص جلال لقى رضا وهي بتبصله ومصدومة من المنظر ونسيمة بتحاول تبوسه ومقربه ليه بالشكل دا !!