الجزء الثاني من الفصل الخامس والثلاثون رواية الخادمة الصغيرة الجزء الثاني
_ أنا لما كنت شيطان .. كنت شيطان عشان أذيت ملاك زيك .. ولما بقيت انسان .. بقيت انسان عشان سكن قلبي الملاك ...
سكت لحظة وهي بتتأمله وهو بيكمل والكتمة في صوته
_ بس بعد فوات الأوان .. لكن إنتي حييتي جوايا كل مشاعر الإنسانية والحب والحنان والرحمة.. علمتيني أبقى بني آدم...
فضلت تركز في كلامه ونبرته ونظراته .. كلها ضعف واستجداء ليها انها تسامحه ...لكنها سكتت وبعدها قالت بخذلان
_ انسان بقى ولا شيطان .. مش فارقة خلاص ...
وهنا جلال مد ايده التانية وقالها بحنان
_ تعالي نامي هنا !
شاور على الجانب الفاضي من صدره ... بصتله رضا بسخرية وغمضت عيونها ومستجابتش ليه ... وهو تنهد ورفع راسه يبص لفوق وهو مش عارف .. هيفضل كدة لحد امتى ! امتى مغفرة ورحمة ربنا هتنزل عليه ! ..تعب ومبقاش قادر خلاص ... بس لازم يتحمل ..