الفصل الثامن والثلاثون من رواية الخادمة الصغيرة 

حست بغيرته عليها فهزت راسها بطاعة ورقة وهي بتقوله 

_ حاضر ..

وخدها من ايدها الصغيرة ومشوا لحد ما وصلوا للسفرة إللي عليها الأكل في الهواء الطلق ومازن فضل واقف يبص عليهم وشارد .. حاسس بشعور غريب مش قادر يفسره .. بس كان شعور مش مريح خالص

_ يلا يلا راحوا على الطرابيزة 

قالتها زهيرة لانجي إللي كانوا واقفين وشافوا كل حاجة وقالت انجي بضيق 

_ أووووف ابنك بوظلي كل حاجة 

اتضايقت زهيرة _ متقوليش على ابني كدة ، دا ذوق زي مامته 

فانفعلت انجي_ قصدك إيه يا زهيرة إن أنا مش ذوق 

تنفست زهيرة وقالت بصراحة_ أنا مقولتش كدة .. بس دا ميمنعش إن الحركة دي مش ذوق خالص

_ زهيرة!!!

حذرتها انجي فقالت زهيرة بصدق 

_ بس أنا ماليش دعوة دي حركات حماوات وعارفة إنك غيرانة على ابنك منها .. بس خليكي عارفة إنك انتي إللي بتجري شكلها والبنت طيبة 

_ طيبة دا أنتي إللي طيبة 

قالتها انجي بسخرية كبيرة 

وبعدين راحوا للسفرة وفطروا وسط توتر كبير بين مازن وجلال ، كل شوية جلال يحط ايده على رجل رضا ويقبض عليها بعنف وتملك ، فبتبصله تلاقي أعصابه مشدودة وباين عليه إنه مش مرتاح فبتحط ايديها على ايديه من تحت الطرابيزة فبيبصلها جلال فبتبصله بحنان كبير أوي وعيون فيها لمعة كلها عشق وهيام لجلال وكأنها بتوصله إنها ليه هو لواحده وبتطمنه وفعلاً بعد لحظات ارتخت اعصاب جلال وهدأ شوية وهنا مازن كان هيتجنن لأنه فهم إللي بيحصل وإن إزاي جلال من نظرة ولمسة هدأ كدة ونظراته لانت وبدأ يشارك في الكلام ويفك شوية ... وتأكد إن البنت الصغيرة ليها تأثير السحر عليه ... 

 رضا على فكرة مكانتش تعرف إن جلال غيران بس هي كانت حاسة انه غيران ولكنها متعرفش إيه السبب ... ودا لأنها مشافتش إن فيه أي حاجة غريبة حصلت تخليه يغير . 

خلصوا الفطار وجلال قام يدخن سيجارة بعيد وهو بيشرب القهوة فراحله مازن ووقف جمبه وسأله مباشرة  

_ اتبسطت في الجواز ؟

استغرب سؤاله ومع ذلك مكانش مستبعد إن مازن يتكلم في الموضوع دا !! فأخد  نفس من سجارته وجاوب 

_ جدا 

_ أيوة يعني worth it?!

اتضايق من تكرار السؤال ولكنه رد بتأكيد 

_ آه جداا 

هز مازن راسه ببرود وشرب شوية من قهوته وهو بيقول 

_ تمام ... 

ساد صمت وجلال بيفكر هو ليه يعني بيسأل ومهتم أوي كدة ... كان هيموت ويعرف السبب وفعلاً قطع الصمت 

_ شايفك مهتم ؟!

ابتسم مازن باتساع_ بصراحة عجبتني !

اتصدم جلال من الرد فبصله مازن وضحك ضحكة مش سالكة خالص وهو بيقول

_ الجوازة .. يعني متوقعتش بصراحة إنك تتجوز 

تهجم وش جلال واتعدل عشان يقف في مقابل مازن بدل ما كان واقف جمبه 

_وليه دا بقى ؟ 

اتكلم مازن ببساطة _جلال متفهمنيش غلط بس أنت .. كنت يعني بايع الدنيا خالص

_ ودا يخليني مش من حقي اتجوز ؟!!!

_ من حقك طبعا بس أصل رضا مراتك اكتشفت إنها محترمة أوي يعني ، عمري ما تخيلت إنك هتتجوز واحدة كدة ..

اتعصب جلال وبان في صوته _اكتشفت !؟ 

رد مازن بتبرير_ قصدي يعني باين عليها حجابها والتزامها 

على نفس الوتيرة المتعصبة سأل جلال 

_ مالها يعني!!؟

رد مازن بأسلوب خبيث ومتلاعب

_ مش شبهك خالص .. أنت كنت محتاج حد شبهك

استمرت أسألة جلال إللي بتدل على أد إيه الكلام مش عاجبه وأنه عاوز يفهم ليه الكلام دا أصلا بيتقال 

_ شبهي إزاي يا مازن؟ 

رد مازن_ بايعة الدنيا زيك 

الجملة جرحت جلال وكل كلام مازن ضايقه وكان كل معنى كلامه أنه وحش وانه مينفعش يتجوز بنت محجبة ومحتشمة ، لكن جلال بص لمازن من فوق لتحت وهو بيرفع القهوة لشفايفه وبيشرب ببرود أجاد تمثيله 

_  يلا مش مشكلة سبتهالك دي ... أبقى استمتع بيها  

اتعصب مازن من جملتة وفقد سيطرته على أعصابه 

_ أنت متستاهلهاش .. طريقة كلامك معاها وحشة أوي ، حاول تحافظ عليها وتحسن من نفسك 

قربله جلال بعنف واحتدت المشاحنة بينهم 

_ إياك تتكلم معايا باللهجة دي تاني  ، متتعودش عليا يا مازن مش معنى إني في بيتكم إني هسكت ، متستفزنيش عشان مندمكش وأنت عارف أنا مبيهمنيش ! 

جلال كانت لهجته قوية جداا وفيها تحذير وتهديد واضح ، فخاف مازن منه لأنه عارف إن جلال لما بيهدد فهو فعلاً مش بيهزر وبيكون مستغرب عصبية جلال وغضبه آه صحيح هو حاول يستفزه وحاجة جواه كانت عاوزة تضايقه لكن هو عارف إن جلال أصلا بارد ومش بيهمه أي حاجة بتتقال عليه بس الظاهر كدة إن رضا زي ما غيرت حياة جلال وخلته راجل متجوز .. فهي غيرت فيه حات تانية كتير !

اعتذر مازن لجلال لأنه مش عاوز يخسره ومش عاوز زعل بينهم 

_ أنا آسف يا جلال ، متفهمنيش غلط ، أنا مبسوطلك من كل قلبي إنك لقيت بنت في أخلاق رضا ، بس أنا خايف تبوظ علاقتكم بأفعالك

بصله جلال ببرود وجاوب بتأكيد وبنبرة قوية 

_ متقلقش أنا استحالة أبوظ علاقتنا ... 

_ ودي حاجة تسعدني أنت عارف غلاوتك عندي ..

ابتسم مازن فقابلته تكشيرة جلال القوية ورمى السجارة من ايده وداس عليها برجله فتوتر مازن وخاف جلال يتهور بس جلال تخطاه ومشي وبيتوجه لداخل البيت .. 

_____

الخادمة الصغيرة, [15/08/2023 09:19 ص]

رضا بتقوم بتحس إن بطنها وجعاها أوي بس هي بتتحمل وبتفكر إنها لو قامت اتمشت شوية هتفك .. 

جلال بيكون داخل الحمام فمازن بيستغل الفرصة دي وبيحاول يتعرف عليها وبيروح يتمشى معاها وفجأة بتلاقيه ماشي جمبها 

_ مالك شايفة مش مرتاحة 

سألها عشان يفتح معاها كلام فردت بأدب

_ لأ هما بيتكلموا في حجات بينهم وبين بعض وجلال مش لقياه فقولت اتمشى شوية على ما يظهر 

تفهم كلامها واتضايق أنها مش عارفة تقعد من غير جلال، بس حب يفتح معاها موضوع مهم وقال 

_ متفهمنيش غلط بس بصراحة أنا مفهمتش  إللي قولتيه ، يعني إزاي عاوزة تشوفيني من زمان 

ابتسمت وردت _ أني كان قصدي إني كان نفسي أشوفك من زمان عشان أشكرك  على إللي كنت بتعمله مع جلال ، لولاك كان ضاع 

اتضايق لأقصى درجة ورد بضيق وغيرة مقدرش يسيطر عليهم 

_ ماهو فعلاً جلال ضايع

لكنه تفاجئ من دفاعها القوي عليه 

_ جلال مش ضايع ولا عمره هيكون .. لسة قلبه أبيض وطيب ونضيف ودا نادر في الزمن دا 

ردد جواه بسخرية " نضيف ! " آخر شاب ممكن يتقال عليه كدة هو جلال  

_ أيوة ، كويس ..

رد عليها باقتضاب فسألت رضا 

_ مش المفروض إن أنت تكون بتدرس دلوقتي

جاوب _ لأ ما هو في إجازة

ابتسمت بشرود وهي بتسأل

_ دراسة الطب صعبة مش كدة 

فكرها مهتمة بيه وعاوز تبدأ كلام فجاوب 

_ لأ أنا لسة مدخلتش طب 

سألته_ إزاي ؟

فشرحلها _ بصي يا رضا دراسة الطب في أمريكا مش زي هنا في مصر ، هناك مختلفة شوية .. 

استغربت فكمل _ يعني هناك لازم أدخل الأول أي نوع كلية علوم ولما أتخرج منها أقدر أدخل كلية الطب 

وابتسم بسخرية _ وطبعا لازم بأعلى الدرجات والمنافسة شديدة جدا 

فجأة لقاها بتبص ادامها بشرود وقالت بنبرة بان عليها القلق والزعل 

_ يااااااااه ده طلع موضوع كبير أوي 

ابتسم على شكلها اللطيف وحس باهتمامها القوي تجاه الموضوع دا فسأل 

_ بتسألي بتركيز يعني شكلك مهتمة بدراسة الطب

ردت بتلقائية_ لاء أني مهتمة بجلال 

تغيرت تعابير وشه ١٨٠ درجة وهي بتقول بصدق وحب  وشرود ونست تقريباً إنها واقفة مع حد 

_ أصله هو إللي عاوز يبقى دكتور ... بس ده شكله هيتعب أوي على ما يوصلها .. الله يكون في عونه وينوله إللي في باله قادر يا كريم ... 

اتصدم .. لأ دا ذُهل من حنيتها وتفكيرها الغير متناهي في جلال ! لدرجة إنه قال 

_ مش معقول جلال واخد كل عقلك ، للدرجادي بتحبيه 

 

ضحكت بكسوف وبصت في الأرض ومعرفتش ترد على كلامه ... 

 

أما من بعيد جلال بيشوفها وهي بتضحك معاه ولكن قبل ما يتصرف بيلاقي البوابة الكبيرة بتتتفتح وبيدخل منها عربية رامز إللي بيروحله مازن يستقبله ورضا بتتراجع شوية لحد ما توصل لمكان جلال وإللي كان واقف عند أحد الأبواب إللي بتدخل البيت تجاه الصابون

_ رامز ! 

قالها مازن لما رامز خرج من عربيته وخلاص قرب على مدخل البيت ولكنه كان رايح يستقبله فقابله في نص المسافة 

_ إيه المفاجأة دي 

سأل رامز بمشاغبة _ مفاجأة سعيدة ولا وحشة

رد مازن بجاملة _ لأ طبعا سعيدة ... اتفضل 

وتوجهوا للداخل وجلال كان واقف يبص لرضا بضيق شديد وكان هيكلمها بس دخول رامز هو إللي منعه وهو بيقربله وياخده بالحضن 

_ عريسناا .. وشك منور دا الجواز شكله حلو ولا إيه 

مبيردش جلال فبتستغرب رضا حاله ولكن رامز أول ما بيشوف رضا بيحاول يبص على أي حتة في جسمها بس مبيعرفش يفسر تقاطعيها ودا للأسف خلاه يحس بفضول تجاهها أكتر وقال بذوق غريب عليه 

_ ازيك يا مدام رضا .. أكيد أنتي مش عرفاني بس أنا هعرفك بنفسي ، أنا رامز صاحب جلال جوزك 

ردت بتهذيب_ أهلا يا أستاذ رامز 

كتم ضحكته بصعوبه على كلامها ..

_ أستاذ !!!  احم احم هههههه

تأفف مازن من سخافة رامز إللي قال _ آسف مش قصدي .. بس يعني .. ممكن تقولي رامز بس 

_ رامز !!!!!! 

هنا جلال صوته احتد وارتفع وهو بيحذر رامز انه ميتمتداش مع رضا 

هنا تدخلت انجي إللي جات من وراهم وهي بتقول 

_ الله ما تسيبها تتعرف على أصحابك يا جلال أنا شايفة إنها متقبلة الموضوع على الآخر ... 

وبعدين بصت لمازن وسألته هو بالذات

_ مش كدة يا مازن ؟

فجاوب مازن بإعجاب واضح 

_ أيوة رضا فعلاً ... ذكية واجتماعية جدا 

ضحكت ووجهت كلامها لجلال 

_ شوفت يا جلال ؟ قولتلك يا حبيب ماما . 

كان قصدها خبيث إن رضا بتحب الرجالة وانها مش كويسة ومش نضيفة 

وجلال بيفهم قصدها فوراً وبيفتكر كلامها إللي قالته قبل كدة وبيتعصب جدااا ولكنه بيقرر يلغي الفكرة دي من دماغه عشان مينكدش على حياته  مع رضا خصوصاً إنه مبسوط جدا معاها ... 

____

وبعد شوية رامز بيقولهم انه جاي أصلا عشان عاوز جلال في حاجة  وهيروحوا وهيرجعوا ولو مرجعوش محدش يقلق عليهم ... 

_أنا بس عاوز جلال في حاجة مهمة .. متقلقوش . 

بيروح جلال يجيب الجاكت بتاعه ومازن بيقرب على رامز يكلمه 

_ اجي معاكم فيه حاجة طارئة يعني

رد رامز _لأ حاجه مش هتناسبك أنت يا دكتور 

أصر مازن أنه يعرف_ أيوة انتوا رايحين فين يعني ؟!!

الخادمة الصغيرة, [15/08/2023 09:19 ص]

_ أنت عارف مشاوري أنا وجلال 

_ بردو .. حتى هنا  !!

_ياخي متبقاش رخم بقى الله ، بعدين هخليلك الجو مع القمر

مفهمش مازن _ قمر !! قمر مين!!؟ 

فغمزله رامز وهو بيشاور بعنيه على رضا إللي قاعدة بعيد فبيتغصب مازن من أسلوب رامز وكلامه 

_ رامز بلاش تلميحات سخيفة ملهاش لازمة 

تأفف رامز وقاله _ خلاص أنا آسف ممكن تسيبني أمشي بقى 

وبينادي على جلال _ ها يا جلال جهزت ؟!

بييجي جلال وإللي كان بيظبط شعره وبيلبس الجاكت وبيقول 

_ أيوة يلا .. 

هنا مازن بيحاول يوقفه عن إللي هو رايح يعمله 

_ جلال أنت رايح فين .. أنت عارف أنت بتعمل إيه؟!! 

بصله جلال بسخرية _ مازن هو أنت ليه عامل فيها ماما أوي كدة ... 

وفجأة أحتدت نظراته وهو بيحذره تاني 

_مالكش دعوة .. مش هفضل اقولهالك كتير 

وبيسيبه وبيمشي وبيروح مع رامز ..تحت نظرات رضا الحزينة إنه سابها لواحدها ومشي ، وقلبها بيكون واجعها وضرباته عالية جداً وقلقانة أوي ، حاجة من جواها مرعوبة ، وفضلت تذكر ربنا في سرها وهي قاعدة مع انجي وزهيرة ومازن ... عشان قلبها يتطمن .

 ومتعرفش إن لو هي عرفت جلال رايح فين .. هي عمرها ما هتطمن لحظة واحظة ! 

_ _

الفصل طويل مكانش راضي يخلص 😹❤️ 

تفتكروا جلال هيروح مع رامز ؟... 

تفتكروا هيخون رضا؟

ولا مش هيقدر وهيكتشف إنه فعلاً بيحبها ؟ 

وتفتكروا مازن هيفضل ورا رضا ولا هيفوق لنفسه ؟ 

ورامز .. رامز يا جماعة .. شايفينه واحد خطر ولا واحد أهبل عادي ؟ 

أما انجي بقى .. فلنا كلام آخر.. آخر تماماً 😹❤️🥲 

ياريت تكتبوا رايكم واللي عاوز يشتري الرواية كاملة يكلمني