الجزء الرابع من الفصل السابع والثلاثون رواية الخادمة الصغيرة الجزء الثاني 

أما عند كريمة ورضا .. رضا لقت حجم ومقاس الشنطة إللي هي عوزاها وجات تطلع مسكتها كريمة من ايديها وقالت بحزن ورجاء 

_ قوليلي الحقيقة يا رضا 

ملامح رضا اتشنجت وكأنها مش عاوزة تجاوب فقالت كريمة

_ اسمحيلي أقولك رضا

_ مبحبش الاسم دا ! .. 

ردت رضا بجمود والاسم فعلا بتكرهه وبتكره نفسها القديمة .. فقالت كريمة 

_ طب قوليلي يا أميرة.. إيه إللي حصل ؟ علي ليه إيد في إللي بيحصل دا ؟ 

بصتلها رضا وقالت .. 

_ علي مالوش إيد .. انتي ربيتي راجل يا كريمة .. متقلقيش عليه !

كلامها كان صادق فعلا لأنها شافت علي بيخاطر حرفيا عشان حياة .. بيخاطر بحياته ونفسه وسمعته علشانها !... وبعدها ربتت على كتفها وقالت بابتسامة وهي بتفتكر شجاعته

_ ومش لازم أي حد فينا يقلق وهو موجود.. بجد علي راجل ومحترم .. 

_ طب إيه الكلام إللي 

قالت كريمة وهي بتدمع فقاطعتها رضا

_ هبقى اشرحلك كل حاجة بعدين .. بس اوعي تصدقي على ابنك حاجة ! وبعدين دي حرباية .. هتصدقيها ؟ 

هزت كريمة رأسها بالنفي وبعدها ابتسمت لرضا وهي بتقولها 

_ طمنتيتي الله يطمن قلبك .. 

_ اتطمني .. 

قالت بابتسامة .. وبعدها سألت ببعض التردد 

_ هي فين أوضة جلال ؟ 

_ جلال نقل من عند نسيمة وبقى ينام في مكان تاني

_ أه عارفة بس مش مركزة بالظبط هي فين 

قالت رضا وكل ما تتكلم عن جلال بالذات تتوتر .. ابتسمت كريمة وقالت 

_ أوضته جنب اوضة يحي .. لو مش عرفاها فهي اللي بعد اوضتنا علطول .. 

ابتسمت رضا ليها وخرجت من الغرفة وهي متوجهه لغرفة تانية .. غرفة جلال ..