الجزء الثاني من الفصل السادس والستون من رواية الخادمة الصغيرة الجزء الثاني 

____

جلال لم يفقد وعيه ولكنه حصله هبوط فجأة من شدة الصدمة  .. لكنه كان قادر يقف على رجليه ويتحرك بس محتاج مساعدة .. وهنا جه دور رضا إللي ساعدته ... 

خرجوا من أوضة انجي وهي بتسنده ..

وهنا عين جلال وقعت على حقائب السفر الخاصة برضا ! .. في وسط توهانه وحسرته .. سأل بصوت مهدود 

_ هتسافري !

_ فكر في نفسك دلوقتي بس ! ... 

قالت بصوت جاد غير حاد ...وكأنها بتقوله مش مهم أي حاجة دلوقتي غير صحتك ...ولا سفر .. ولا أي حاجة في الدنيا .. 

وفي طريقهم للغرفة كانت حياة واقفة ويحي كمان ساند على العكاز بتاعه ! ... 

شافوا أبوهم في منظر صعب جدا وهو منهار ... فضلت رضا بصالهم وساكتة وجلال مقدرش يرفع عينه فيهم ..

حياة كان واضح جدا انها بتعيط ... ويحي واضح انه متأثر جدا .. مجرد عيال صغيرة سمعوا حجات مكانس لازم يسموعها !  .. رضا اتوترت.. وفضلت واقفة ودراع جلال على كتفها وايديها في خصره ... وكل إللي اتمنته ان الأولاد ميكونوش سمعوا حاجة ... 

______

_ في إيه يا نعمات ؟ 

قال رامز وهو قلقان جدا من دخول نعمات للبيت عليه بهذا الشكل المُقلق جدا والخوف واضح في عينيها

زي ماهو رامز عايش في البيت إللي جلال عمله ليه في بهو الفيلا بتاعته ... 

نعمات كانت قاعدة عينيها كلها صدمة .. سمعت حقيقة ولا في الخيال !! ... عمرها ما توقعتها .. الحقيقة قهرتها هي ذات نفسها لدرجة انها حست بالشفقة تجاه جلال  .. 

رامز طيعا يادوب كان لحق ينام ساعة لأنه أصلا كان سهؤان مع جلال ..  ولما حس بنعمات بتدخل للبيت فتح عيونه ولقاها في الحالة دي من الذهول 

قعد جنبها وسألها ولكنها زي إللي بلعت لسانها .. بتبصله وساكته 

_ يا حبيبتي كدة هتقلقيني بزيادة .. في إيه يا نعمات خلصيني عايز أنام منمتش طول الليل .. 

بصتله وعيونها مدمعة .. عيون واحدة شهدت على الماضي كله ودلوقتي هي كمان اكتشفت حجات جديدة .. 

_ كنت رايحة أشوف رضا .. 

وسكتت .. وعيون رامز زاد قلقها

_ إيه وبعدين؟ شديتوا مع بعض ؟ 

بصتله وهزت راسها وهو كان هيتشل حرفيا منها لما تيجي تحكيله أي موضوع .. ايديها بيحتكوا ببعض في توتر كبير ومش بتبقى عارفة تقول إيه.. 

_ يا حبيبتي اخلصي بقى .. 

_ انجي ...انجي قالت كلام وحش أوي! .. لجلال 

قالت وهنا كل حواسه اتشدت للي بتحكيه .. وظهرت ملامح الجدية على وشه وهي بتكمل 

_ مسمعتوش كله بس .. بس إللي فهمته ان .. ان هي كانت بتحط لجلال علطول حجات .. حجات عشان يبقى دايما مش عارف .. يسيطر على نفسه ! ... 

اتوتر رامز وحس بالخوف والرهبة ... هنا نعمات بصتله وهي متفاجأة من التعبير إللي اترسم على وشه ! .  

قلقت .. خافت يكون ليه إيد في الموضوع دا .. 

سألت بترقب وهي حاطة ايدها على قلبها خايفة من الإجابة 

_ أنت كنت عارف ؟ 

سكت رامز وعقله كأنه سارح في مكان تاني خالص ... وعقله بيرجع لزمان وهو بيفتكر .. من أكتر من ١٧ سنة .. 

_ إيه دا ؟ 

كان في عربية ... وأول ما دخل وزي عادته عنده فضول وبيحب ينخور ويلعب في كل حاجة .. وهو بيلعب وبيدور على حجات في العربية .. لقى حاجة هو عرفها كويس جدا !! ... لكن النوع دا مش بيتباع في مصر .. دا موجود في أمريكا وبس ! .... شافه وإللي جنبه دخل العربية .. رفع العلبة إللي في إيده لعيون إللي دخل العربية وقاله 

_ وطلعت نمس واحنا مش عارفين . 

إللي أدامه وشه جاب ألوان واتوتر جدا .. وشد العلبة من إيده بعنف وهو بيقوله 

_ هات أوعى إيدك

لكن رامز مبطلش خبثه وهو بيضايقه وبيقوله 

_ يا واد يا لعيب وعامل نفسك بريئ ... ..

_ رامز !

فاق رامز من شروده وعقله إللي فجأة وداه للذكرى دي !! .. الذكرى إللي قبلها هو بعد وساب جلال عشان الظروف إللي حصلتله .. مكانش يعرف انه سابه مع وحوش .. وحوش عاملين نفسهم صحابه .. على الأقل هو كان ظاهر انه مش متصالح مع جلال .. لكن الباقي كانوا عاملين نفسهم حبايبيه وخايفين على مصحلته وهما أكتر ناس أذوه في الدنيا ! .

_ حد شافك وانتي هناك ؟ 

سأل ... ردت نعمات بريبة 

_ لأ محدش شافني .. أنا سمعت الزعيق وقربت لقيت الباب مفتوح وشوفت جلال ورضا وانجي بس محدش منهم شافني .. وبعدها مشيت .. 

هز راسه وبعدها طلب من نعمات بهدوء عكس الخناقة إللي جواه ..

_ أبقي بعد شوية رني عليها قوليلها ينفع نيجي ولا لأ ! ..

_ متعرفهاش انك عرفتي حاجة .. 

هزت راسها بالموافقة ورامز قام يغسل وشه .. تقريبا مفهاش نوم النهاردة .. وعقله لواحده كواحد عارف كل حاجة حصلت في الماضي .. قدر يربط كل المواضيع ببعض ...ولكن لازم يسمع من جلال كل حاجة قبل ما ياخد أي تصرف ..

 

_____