اقبتاس من رواية الرقيقة والبربري

 اقتباس من رواية الرقيقة والبربري 

_ أنا فاكر أول مرة شوفتك لما جيتي الشركة ..وقتها مكونتش أعرف ان رأفت باشا عنده بنت جميلة بالشكل ده .. 

قالها ذلك الشاب وهو يتأمل جمالها .. جمال ملامحها البريئة وقوامها الجذاب ... 

وقفت نور أمام مكتب كبير يطلّ على إحدى نوافذ الشركة ، تبتسم بخجل وهي تستمع لكريم ، الذي كان يحاول جاهدًا أن يبدو ودودًا ومهذبًا ، لكنه لم يخفَ عن عينيه الذكيتين ذاك البريق الغامض.. 

_ أنا مش مصدق إنك قررتي تشتغلي هنا، دي حاجة جميلة أوي بصراحة… وجودك في الشركة هيخلّي كل حاجة تنور، ده غير إنك كمان شاطرة، بس مش واخدة فرصتك...

ضحكت نور بتوتر، وهي تحرّك خصلة من شعرها خلف أذنها 

_ بلاش مجاملات يا مستر كريم، أنا لسه مش عارفة أي حاجة، ولسه ببتدي أتعلم من بابا. 

اقترب خطوة ومازالت ابتسامته على وجهه 

_ أنا مش مستر كريم أنا كريم بس ... وبعدين ايه يعني؟ كلنا ابتدينا كده، وأنا في ضهرك، تسألي أي حاجة، هتلاقيني جنبك دايمًا. 

كان يتحدث بثقة ، بنبرة فيها دفء ظاهري ونوايا مدفونة، وعيناه تتأملان ملامحها بنهم صامت... نور شعرت ببعض التردد، لكن صوت ضحكته المرحة ولباقته جعلاها تخفف من حذرها، فتبادلت معه المزاح بكلمات بسيطة، محاولة الحفاظ على المسافة الآمنة.

وبينما هي تضحك على جملة ألقاها، انفتح باب المكتب فجأة...

دخل رامي.

توقف الزمن للحظة.

عيناه وقعتا عليهما معًا، وكأن كل الدماء تجمّدت في عروقه.

كانت نور تضحك... وكريم واقف قريبًا جدًا منها.

رمش رامي ببطء، ثم تحرك ببطء أشد.

مشى نحوهما، وعيناه لا تفارق وجهها.

ابتسامتها تلاشت فجأة حين رأته.

وكريم التفت ونبرته تغيّرت .. 

_ أهلاً رامي … ولا أقول رامي باشا بقى خلاص .. 

زِيف ابتسامته ظهر جليًا لرامي .. فهو منافسه القديم في الشركة ! كان ينافسه على منصبه ..وعلى نور ! 

اقترب منه كريم ومد يده ليصافحه وعلى وجهه ابتسامته الواسعة التي لم تخدع رامي 

_ مفاجأة حلوة دي بصراحة 

لكن نظرة رامي لم تكن لمصافحته...كانت معلقة فقط على نور .... 

---